Hyrje

Publikimi i Historisë shqiptare që nga lashtësia deri në ditët e sotme në internet është një risi e cila përveç kuriozitetit do të ngjallë në lexuesin e saj edhe krenarinë kombëtare. Puna kolosale e zhvilluar për pregatitjen e saj do të shpagohej më së miri në se vizitorët tanë do të mësonin diçka të re për vendin e tyre dhe do të reflektonin paksa mbi sakrificat, mundin dhe gjakun që populli ynë ka derdhur për të mbijetuar.

Historia gjatë viteve të regjimit komunist është shtrembëruar qëllimisht apo në mënyrë të pavetëdijshme në rradhë të parë sepse linja jonë politike pilotohej nga shtete të tjera të cilën historikisht kanë mbështetur armiqtë e popullit tonë. Historianët e periudhës së Shqipërisë Socialiste janë të besueshëm deri në periudhën e Pavarësisë. Më tej Historia e shkruar prej tyre, ndikohet nga rrymat politike. Duke u munduar që të jemi sa më të paanshëm në këtë përmbledhje të Historisë së Popullit tonë nuk jemi bazuar vetëm në një burim por në disa. Jemi munduar të paraqesim thjeshtë faktet e ndodhura pa u ndaluar në analiza politike apo propagandistike.

Kemi zgjedhur si parathënie të Historisë së Shqipërisë një letër të botuar prej publiçistit të njohur z. Tajar Zavalani i cili që në vitin 1954 ka botuar Historinë e Shqipërisë dhe ka mbështetur atë në fakte të rrëmuara në bibliotekat e shteteve perëndimore. Pikërisht ballafaqimi me faktet e bën Historinë e shkruar prej tij të paanshme dhe të besueshme jo vetëm për shqiptarët por edhe për të huajt. Materiali i botuar prej tij në këtë libër edhe në ditët e sotme është një ndër më të mirët dhe më të pasurit.

Në letrën që përbën parathënien do të zbulojmë vështirësitë e shumta, patriotizmin dhe sakrificën e atyre që bëjnë diçka të vlefshme dhe të nevojshme për popullin e tyre. Kjo letër e shkruar në vitin 1954 merr një rëndësi të veçantë duke patur parasysh gjendjen e Shqipërisë në atë periudhë të turbullt.